Ho fahatsiarovana ny ezaka fitoriana ZOOM, niaraka tamin’i Pastora Paul Saotra RATSARA, ny mpikambana (sy ny tsy mpikambana ) MAFA sy AMI3A, May, Jona 2020
EZAKA
1.Nisy antso fanentanana
milaza hoe: “Mirotsaha !
Misy ondry ho fahanana
Izay miandry any an-tsaha.
Mandehana hanambara
Fa raha fenon’ny FANAHY,
omban’ilay Mpiandry tsara
ny ho avy tsy hampanahy… “
2. Fotoana fohy tam-pelatanana
Nanomanana ny asa;
Voafetra ny enti-nanana,
Nefa vita ny kinasa !
Ny FANAHY no nampahery
Sy nanafy ny rehetra,
Ary nomba sy nijery
Tamim-pitia tsy nisy fetra.
3. Ny mpitandrina RATSARA
Notinendry re ny molony
ka Teny soa mangarahara
sy mafonja no natolony.
Ary ny mpandray anjara,
Ny tànana nikirakira,
Samy faly nanambara:
“amin’Ny Tompo, mifikira !”
4. Ireo nitrotro tamim-bavaka,
na imaso na ivoho,
Ireo rehetra tsy an-kanavaka
nitondra zava-mahasoa.
Iray mpikambana na tsia
Ny MAFA sy AMI3A
Ireo rehetra niara-dia,
Niezaka, nitomban-dahy !
5.Ireo ‘zay mpikarakara,
Ireo nanolotra fotoana,
Ho soa sy tsy hamarara
izay naseho manoloana…
Ireo nitondra AINGA VAO
ara-batana, ara-tsaina…
Ry FANAHY, ô ombao
Mba hanjary ’zay nefaina !
Jean Andriamananaivo (2020)
Atolotra an’i Rivano, i Andry, i Herimihaona, i Michael ary i Niaina, sampana teknika ZOOM (MAFA*, AMI3A*)
Ho fahatsiarovana ny Ezaka fitoriana ZOOM : miatrika ny hoavy, ary feno ny Fanahy, May, Jona 2020
TEKNIKA
Vovonana iadian’ny lohany,
Varivariny andrian’ny tafo,
Niankinana hatrany am-boalohany,
Tombam-bidiny lafo dia lafo.
Raha toa ka tsy nisy azy,
Tsy ho tanteraka ireo fotoana;
Tena marina, tsy vazivazy,
Angamba ho fotsy sy foana.
Tena nanana fandavantena
Ary niasa na andro na alina;
Nahim-pony fa tsy noterena…
Fitia latsa-paka sy lalina !
I RIVANO, i ANDRY, i HERIMIHAONA,
I MICHAEL ary koa i NIAINA :
Dimy lahy, no indreo tafahaona…
Misaotra eram-po, eran-tsaina !
Isaorana koa ny ankohonany,
Nanaiky ny fotoan-dany;
Raha nisy ny fanakombonany,
Angamba ho sarotra ihany…
Ny Tompo hameno ny banga,
Hanonitra ny lany rehetra;
Ka na inona na inona hitranga,
Ny fitahiany tsy hisy fetra !
Jean Andriamananaivo (2020)
*Fikambanana MAFA (Malagasy Advantista Frantsa Atsimo) sy Ami3A ((“Fikambanana Advantista Miray Aty An-dafy Avaratra”)